À mon Seigneur, Monsieur de Maupas, Abé de saint Jan de Laon, conseiller, et Aumonier ordinaire du Roy. [f. *2-*2v°]

Mon Seigneur, ç’a esté presque l’argument commun de tous les Françoys, qui ont mis leurs compositions en lumiere depuis vint ans, proposer, ou qu’on avoit dérobé leurs copies, ou que l’importunité de leurs amys les forçoit et contraignoit à l’impression d’icelles. Je sçay combien la Modestië et Vergoigne sont louables : mais mettre en leur rang une simplicité et defiance de soy, celà m’a semblé tant ridicule et moquable, que n’ay voulu, ne peu en abuser : ores qu’entre aucuns il soit tenu pour opinion et coustume. A ceste cause, et au rebours d’eux, ay eu tousjours intention et desir : mesmement dès l’heure, que fistes celle humanité et grace, de me tirer d’une captivité et prison, à la liberté et franchise de vostre service, vous faire paroistre et donner chose de ma plume, qui vous aportast tel plaisir, qu’eusse bonne ocasion de m’en contenter : n’ayant vostre main esté jamais close à ceux, qui vous ont presenté de leurs œuvres, ou petites, ou grandes. Et pour monstrer par effait le naïf de ma volunté, aprés quelque nombre de mes Vers, ausquels daignastes n’agueres porter ceste faveur de les lire et garder : j’ose vouër maintenant à l’excellance de vostre nom, la premiere partië de mon nouveau Tristan de Leonnois, plus vostre que mien, pour les bons traits, claires lignes, et belles couleurs, dont l’avez enrichy, m’en oyant lire la minute. Dequoy ne m’émerveille : ains le louë : consideré, qu’avez esté apris et norry en la Cour, de ce feu premier et grand Roy Françoys : durant le regne et au prouchas duquel, les meilleurs langues, avec la nostre, ont pris leur ressource et lustre, ainsi que les arbres et herbes r’entrent en verdeur et croissance à la prime-vere. Non que ce soit par presumption de le sentir digne de vostre Librairië, ou de l’objét de votre œil : trop bien d’une esperance conceuë, que les Lecteurs, connoissans la singularité de vostre parler, la pureté d’iceluy, comme estes amy de voz imitateurs, en telles raritez, et voyans le vœu qui vous en est fait, penseront raisonnablement, qu’il merite estre recueilly et parleu, ou pour sa gentile invention, ou pour le bon air et facilité de son stil et langage. Joint, que les traverses drecées par fortune à nostre Roy de Leon, les menées, pratiques, et inimitiez secrettes de ses mal veillans, ne sont beaucoup dissemblables à celles, qu’avez échapées et amorties de fraiche memoire. Or est le sujet d’Armes et d’Amours, matiëre traitant de la fleur des Vertuz, tant hautes que basses : si qu’il n’y aura Gentil-homme, ne autre d’inferieure condition d’esprit et mettable, qui n’y trouve dequoy recréer et alaigrer son ame, lors que tristesse et melencolïe viendront, pour la ranger en cage plombée et sombre. Qu’ainsi soit, sous le personnage de Tristan armé et Chevalier errant, se pourront conoistre les actes d’un Prince magnanime, hardy, vaillant, equitable, debonnaire, prudent et assuré : sous Yseulte, les bonnes partïes aussi d’une grande Dame : Scavoir, comme elle doit estre honeste, courtoyse, modeste, affable, compagnable, civile, avisée et constante : tellement, que la conclusion sera necessaire et evidente de ce qui est requis d’honneur et d’honesteté entre deux Amans, pour l’entretien perpetuel de leurs aymables et amyables afections. Il est bien vray, que tels discours de Noblesse et Humanité, n’ont peu s’écouler, sans y avoir entremellé maintes avanture : où sont recitées quelques industries, subtilitez, infidelitez, trahisons et jalousies. Mais qui vit oncques pré sans chardons, campagne sans ronces, forest sans épines, et moyen vertueux sans estre acosté et enclos d’extremitez vicieuses ? Celles-cy, pour estre fuyës et chassées : l’autre, domestiqué et retenu : et croy assurément que moindre profit n’en raportera celuy, qui y mettra sa veuë et s’y arrestera. Tel qu’il soit toutesfois, sans l’atente et certitude empraintes en mon cueur, du gré qu’en aurez et de la continuë de vostre liberalité vers moy, ne seroit mis ne receu en public ; eu égard à la defaveur, dont la plus grande partië des hommes du jourd’huy étrangent les Muses, et le peu de cas qu’ils font de Science et Vertu. Un autre point encor’ m’â fait briser la haye, et rompre l’empeschement : c’est que vous, Mon Seigneur, qui avez esté desjà mon sauveur second, serez maintenant defenseur de mes labeurs : sachant et entendant tres-bien que valent les écris venans de bon lieu, la difference du vieil Rommant à nostre histoire renouvelée, et la pene d’illustrer et faciliter telles choses. Ce qu’assez conu de ma part, feray moins de conte des envieux et médisans, que ne faisoit jadis le Poëte Sulmonien, des froids et barbares Getes. Et pour ne vous tenir plus longuement en propos, qui pourroit ennuyer, vous ayant pour Bienfaiteur (neantmoins que je ressemble d’avantage Melibée que Titire) je delibere respondre à ceux qui s’enquerront de mon repos entre les envies et miseres.

O chers amys, Maupas, et vostre et mien,
Voire mon Dieu second, m’â fait ce bien.
A Laon, en vostre maison de saint Jan, ce xx. Juin. 1554.
Vostre tres-humble et tres-obeïssant Serviteur L’Angevin.