Au roy treschrestien Loÿs .XII. de ce nom. Prologue [f. a-a v°]

Pource que je congnois que oysiveté destourbe et empesche les cueurs des hommes à bien faire par les enhertemens du maulvais esperit, et que tout homme doit tendre à faire tousjours aucune bonne oeuvre, et qu’il ne soit trouvé oyseux moy qui avoye de coustume faire aucuns beaux livres de diverses sortes pour solacier le treschrestien roy Charles huytiesme de bonne memoire pour lequel et à ses bons commandemens en ay plusieurs faitz et ordonnez, en lisant lesquelz il prenoit recreation aux heures et temps qu’il luy plaisoit, et à l’exemple de luy aussi faisoient plusieurs princes, gens de bien et de vertus, ces choses longuement en moy pourpensées, et que la chose acoustumée de faire est forte et dure à delaisser comme dit le philosophe : durum est assueta relinquere, et aussi pour eschiver oysiveté, apres ce que j’ay peu congnoistre qui plus resjouisse ung noble cueur et chevaleureux, et singulierement roys, princes, barons, chevaliers et escuiers c’est de ouyr diviser et racompter les beaulx fais d’armes, appertises et vaillances des roys preux, chevaliers hardis et entrepreneux qui anciennement furent.

Et pource, mon treshonnoré et souverain seigneur, Loÿs douziesme de ce nom, treschrestien roy de France, en vous voulant à mon povoir servir de ma qualité comme ay fait vostre predecesseur à la louenge de Dieu et honneur de vous chier sire vous ay fait ung petit livre apellé Ogier le Dannoys ouquel en prenant vostre recreation quant il vous viendra à plaisir l’ouyr lire pourrez veoir comment plusieurs belles entreprinses, faitz d’armes et appertises de diverses manieres furent faictes des vaillans roys, princes et chevaliers qui ont regné par cy devant, par lesquelz faitz ils ont renom et memoire. Et combien que vostre royale magesté soit scientifique et ait congnoissance de toutes ces choses ce nonobstant à l’exemple de vous treschier sire, les jeunes princes, chevaliers et escuiers prendront exemple à science et armes vouloir ensuyr et imiter, et en lisant ce petit livre esmouveront leurs cueurs à toutes vaillantises et appertises d’armes faire, comme ont fait ceulx oudit livre nommez, ainsi que vostre noble et royale magesté pourra veoir en lisant icelluy livre, et tous nobles cueurs à l’exemple de vous, en moy commandant voz bons plaisirs.

[f. a2-a2 v°]

Jhesuscrist nostre redempteur dit comme il est escript au quinziesme de monseigneur saint Jehan, sans moy ne povez vous rien faire. Parquoy nous luy prierons que au commencement de ceste oevre il luy plaise d’estre en nostre ayde, affin que nous puissons faire chose qui soit à sa louange, et à la louange de toute la court celestielle. Et à l’utillité et proffit des lisans et escoutans, et quelle soit cause de leur donner exemple de bien vivre en ce mortel monde. Ainsi que ont fait ceulx dequoy nostre matiere fera mention, lesquelz ont si bien et si vertueusement vescu en ce monde qu’il en est memoire perpetuelle. Car en lisant les faiz et vaillances des princes et vaillans chevalliers qui ont regné par cy devant, le cueur se meult à les ensuyvir et d’aquerir honneur et bonne renommée. Pourquoy j’ay voulu ramener ce present livre à memoire, lequel fait mencion des nobles prouesses et grans faiz d’armes, que fit jadis le noble Ogier le Dannoys, qui fut du temps du grant roy Charlemaigne jadis roy de France, et empereur de Romme, lequel print tant de paine pour exaulser la saincte foy crestienne, et qui avecques l’ayde dudit Ogier le Dannoys getta les maulditz Sarrazins ennemys de nostre saincte foy hors de Romme et remist le saint pere pape Leon en son saint sige, que les maulditz payens en avoient getté, et avoient tué tous les crestiens, et fait de l’eglise de Saint Pierre le temple de leurs dieux, comme pourrez ouyr icy apres. Et aussi comme ledit Ogier mena grant guerre au roy Charlemaigne pour l’amour de son filz Baudoin, que Charlot le filz de l’empereur Charlemaigne avoit occis d’un eschequier d’or en jouant aux eschecz, dont il advint une moult grant guerre qui dura plus de sept ans, aussi pourrez ouyr comme la paix fut faicte miraculeusement par le vouloir de Dieu. Lequel Ogier fut filz de Geoffroy duc de Dannemarche, lequel avoit onze freres tous chevalliers et moult vaillans, et furent filz de Doon de Mayence, qui fut tant plain de grant prouesse, desquelz enfans estoit Naymes de Dordonne, Doon de Nantueil, Gerart du Fratre et Geoffroy de Dannemarche. Lesquelz conquirent tant de paÿs sus les mescreans et principallement cestuy Geoffroy, lequel conquist la duchié de Dannemarche avecques l’ayde d’aucuns de ses freres sur les Sarrazins. Et aussi conquist la belle Dannemonde, qui fut fille d’un grant roy payen, laquelle il fist baptiser, et puis solennellement l’espousa en nostre mere saincte Eglise, ausquelles nopces le duc tint court ouverte, et manda tous ses parens et amys : et les festoya moult bien, et leur donna de moult grans et riches dons. Et la premiere nuyt des nopces il engendra en la dame ung bel enfant. La feste dura quinze jours, et puis tous les barons et chevalliers prindrent congié du duc et de la duchesse, lesquelz les remercierent moult du grant honneur qu’ilz leur avoient fait d’estre venuz a leurs nopces. Aussi les barons et chevalliers, les dames et damoiselles remercierent moult le duc des grans et riches dons que le duc et la duchesse leur avoient donnez. Et puis chascun s’en alla en son hostel. La dame porta l’enfant neuf mois, mais avant que le terme fust venu, l’enfant devint si grant et si gros en son ventre que chascun disoit qu’elle feroit deux enfans, dequoy la duchesse avoit moult grant paour. Et quant vint au terme que la dame deut enfanter elle fut tant malade, et eut tant de mal que apres qu’elle fut delivre de l’enfant, il convint qu’elle prist mort, dont le duc et toute la court furent moult troublez, et aussi tous ceulx de la cité, car elle estoit bonne dame, et fort piteuse de povres gens. Et celle propre nuyt que l’enfant fut né les damoiselles du chasteau le mirent en une chambre à part, et à l’eure de mynuit vindrent en ladicte chambre ou estoit l’enfant six belles dames richement abillees, lesquelles on nomme faees, et desveloperent l’enfant, et l’une d’elles nommée Gloriande le print entre ses bras, et quant elle le vit si beau si grant et si bien formé de ses membres le baisa par moult grant amour : en disant mon enfant au nom de Dieu je te donne ung don, c’est assavoir que tant que tu seras en vie que tu soies le plus hardy chevallier qui soit durant ton vivant. Dame dist une autre nommée Palestine ce don que luy avez donné n’est pas petit, et je lui donne doncques que tant qu’il sera en vie que guerre ne bataille ne lui faille point. Alors respondit une autre nommée Pharamonde, dame ce don que lui donnez est moult dangereux, parquoy je lui donne que jamais il ne soit vaincu en bataille. Et je lui donne se dist une autre nommée Melior que tant qu’il sera en vie il soit beau doulx et gracieux plus que nul autre. Et la cinquiesme nommée Presine dist, je lui donne qu’il soit tousjours aymé des dames et que en amours il soit eureux. Et la sixiesme nommée Morgue dist, j’ay bien entendu les dons que vous avez donné à cest enfant, et je vueil qu’il ne meure jamais jusques à ce qu’il ait esté mon amy par amours, et que je le tiengne au chasteau d’Avalon, qui est le plus beau chasteau du monde. Et puis la dame le baisa par grant amour. Et puis laisserent l’enfant et s’en allerent que on ne sceut qu’elles devindrent, et l’enfant demoura criant a haulte voix.