A tresnoble et vertueux seigneur, René de Sanzay, Seigneur Sainct Marsault. Jacques Vincent desire accroissement d’honneur et felicité perpetuelle. [p. 3-6]

Zenocrates le sage Philosophe, tant fort renommé, asseure qu’en vraye amitié consiste bien et mal : comme ayant ensemble affinité. Or ayant cognoissance, vertueux Seigneur, qu’avez esté participant de choses plaisantes : et desquelles l’esprit humain peult recevoir contentement : j’ay bien voulu travailler mon esprit quelque espace de temps, pour traduire l’Histoire amoureuse de Flores, Prince d’Espagne, et de s’amie Blanchefleur. Puis l’ayant achevée, pensant au sçavoir, qui vous faict compagnie, assuré de vostre fermeté, ay prins desir, mettre en François la Complainte que faict Luzindaro, Prince d’Æthiopie contre le trompeur Cupidon, et une Dame. La perte de laquelle, ne luy fut moins fascheuse, que vous a esté le regret, lors qu’esloignates celle en qui gisoit vostre felicité. Je vous prie penser qu’en semblables affaires, celuy se peult reputer heureux, qui est exempt de passion et langueur : ce que je treuve impossible : car ce cruel Dieu des Amans, qui s’est autrefois bandé contre la Deesse Venus sa mere, est en coustume payer en semblable monnoye, ceux qui volontairement prennent plaisir obeir à ses loix. Lesquelles n’ayant en contemnement et mespris, j’ay mis en lumiere ce que vous presente. Et si aucun s’avance, et prent la hardiesse me desestimer pour m’estre amusé sur ceste histoire fabuleuse : je feray mon rampart de l’art d’aimer, escrit par Ovide, et des confabulations amoureuses, composées par Senecque : et pensant en eux, douray allegement à mon esprit. Car encore qu’ilz fussent sages, ingenieux, et subtilz : si n’avoyent ilz la jouissance d’un plus grand privilege que moy. Je croy bien que les trop curieux, ne faudront me declarer amy de fiction. Mais moy je leur respondray, que soubz le sens moral d’icelle, on peult recueillir quelque fruict. Vous avertissant, que le discours de ces deux Amants, nous faict cognoistre avec quelle obligation, ceux qui aspirent donner fin à leur peine, doivent estre constans, et user de vertu : laquelle rend immortel à la posterité, celuy qui s’estudie la suivre. Comme j’ay entendu qu’avez faict, par Maistre Pierre Tredehan d’Angers, mon familier amy, l’heureux commencement duquel, promet quelque chose de bon à ceux de la terre, où il s’est nourry, comme ils pourront voir de brief, par quelque oeuvre Poëtique, qu’il veult mettre en lumiere : attendant lequel, je vous prie vouloir poursuivre la faveur de vostre gloire, sans faire cas du travail qu’avez par cy devant souffert. Et par mesme moyen, continuer vostre amitié envers celuy, qui a perpetuité vous veult demourer treshumble serviteur.